«Кябе ëлу» китабындан. Шиирлер

Омюр къаидеси

Такъдирни къулуна

Раббимиз сече.

Инсан да «шукюр» − деп,

Бу ëлдан кече.

Юдженинъ китабы

Эмирдир бизчюн,

Омюр къаидеси

Эр кунюмизчюн.

Аллахны анъ

Эйи фикирге келип

Элял бир ишни сечсенъ,

Я да ашкъа расткелип,

Софра башына кечсенъ,

«Аллахнынъ ризасына» −

«Бисмиллях», − демек эйи,

Пейгъамбер арзусына

Ниетленип эппейи!

Софрадаки бол нимет –

Раббинъ берген берекет,

Будыр Аллахтан къысмет –

Япкъанынъчюн арекет.

Софрадан тургъанынъда

Сен де: «Эльхамду-ли-лях»,

Олсун даим анъында:

«Шукюрлер санъа, Аллах!»

Дуа эт

Корюльмез Онынъ юзю,

Эр шейни коре «козю»,

Акъикъаттыр эр сëзю,

Бизчюн Танърымыз Озю.

Уймайып джаиллерге,

Барылса джамилерге,

Аллах бизни алгъышлар,

Савапларын багъышлар.

Юджени урьмет этсек,

Эр бир сëзюне етсек,

«Аллаху Акбар!» − десек,

Эмирлерин беджерсек,

Келир о кунь, иншаллах –

Онъар къарты ве бала,

Чечекленир бу дияр –

Эр кес олур бахтияр!

Эйи ниетнен яша

Бу дюньягъа кельген сонъ

Эйи ниетнен яша,

Аллахкъа шукюр этип,

Элял емеклер аша.

Ирадели муминлер

Бир-бирине эминлер.

Ибадет къылгъанларны –

Юдже озю теминлер.

Ана ве баба

Гъает буюк бир эмек

Бала тербиелемек:

Динимизни огретмек.

Омюр ëлун косьтермек.

Инсанчюн буюк къысмет –

Балаларындан урьмет,

Къартлыгъында – зиярет,

Шевкъат эм де мерхамет.