Зейнеп Аббасова
Оджа ве шаире Зейнеп Аббасова 1906 сенеси Акъмесджитте Токъал-Джами маалесинде догъды. 1923 с. Тотайкой оджалар техникумыны битирди. 20-нджи сенелери балалар эвининъ мудири олды, Акъмесджиттеки 12-нджи ве 13-нджи нумюневий-теджрибе мектеплеринде оджалыкъ этти. Шиирлер яза ве «Яш къувет» газетасы, «Илери» журналында бастыра. О девирде язылгъан энъ буюк «Той» адлы поэмасы 1933 сенеси «Къадынлыкъ социализм ёлунда» адлы журналында басылды.
Айны шу сенелери Зейнеп Аббасова чешит сыныфлар ичюн ана тили дерсликлерини тертип эте. 1940 сенеси Къырым девлет педагогика институтынынъ къырымтатар тили ве эдебияты болюгини гъыябий окъуп битире, мектеп мудири оларакъ чалыша.
Сюргюнлик вакътында Фергъана виляетининъ Къува районына тюше. Анда мектеплерде оджалыкъ япа. Шиирлер язмакъны девам эте ве «Ленин байрагъы» газетасында ве «Йылдыз» меджмуасында дефаларджа бастыра.
1967 сенеси Зейнеп Аббасова халкъ векиллери арасында Москвада олды. 1989 сенеси Ватангъа къайтты. Акъмесджит районы Бештерек (Донское) коюнде ерлешти, сонъ Дубки къасабасына авушты. Халкъ итибарыны къазангъан оджапче ве шаире бутюн омюрини балаларгъа, бала тербиесине, оджалыкъкъа багъышлады.
З. Аббасова 1998 с. июнь 14-те вефат этти.
Шаиренинъ бир шиирини дикъкатынъызгъа теклиф этемиз.
БАЛКЪУРТЧЫКЪ
Балкъуртчыкъ чечектен чечекке къона,
Чечектен шербетни сувурып онъа.
Балкъуртчыкъ безмейми чечектен ич де?
Ювасына кире о акъшам пек кечте.
Чечеклер ачалар, ачалар солмай,
Шунынъчюн багъчалар гуллерге пек бай.
Чечеклер балкъурткъа къучакъ ачалар,
Чечектен чечекке талмай учалар
Къокъулы шербетни сюзе балкъуртлар,
Алтын тюс бал джыя сепетке олар.
Къулланылгъан эдебият
- Зейнеп Аббасованынъ шиирлери басылгъан менбаалар:
- 1. Ювачыкъны бозманъыз: Шиир // Достлукъ. - 1990. - Март 8. - С. 3.
- 2. Чёллер; Балкъуртчыкъ: Шиирлер // Йылдыз. - 1988. - № 5. - С. 80.
- 3. Уч, къушчыгъым !; Динъгиль-динъгиль даречик: Шиирлер // Йылдыз. - 1983. - № 1. - С. 126-127.
- 4. Кеманелер чалынсын: Шиир // Йылдыз. - 1981. - № 2. - С. 139.
- 5. Дёмана: Шиир // Йылдыз. - 1980. - №2. - С. 41.
- 6. Улу чёллер: Шиир // Йылдыз. - 1980. - №4. - С. 13.
- 7. Куньтабакъ; Къар ягъа; Пападие: Шиирлер // Ленин байрагъы. – 1974. – Февр. 9. – С. 3.
- 8. Baharde: siir // Jas Leninciler. – 1936. - № 4. – S. 3.
