Абдураим Решидов
1912 сенеси Багъчасарай районынынъ Мамашай (шимдики ады Орловка) коюнде чокъ балалаы (докъуз джан) аиледе догъгъан Абдураим Решидов балалыкътан учуджы олмагъа арз эте. Иште бу истек еди йыллыкъ мектепни битирген Абдураимни Акъмесджиттеки учуджылар азырлав мектебине алып келе. Мектепни мувафакъиетнен битире. Яшнынъ тирнеклиги, тертип-низамы, тырышкъакълыгъы, авиация техникасыны пек яхшы менимсегенини корьген мектеп мемуриети Абдураимни мектепте учуджы-инструктор оларакъ ишке къалдыра.
Он секиз яшкъа толгъанынен Решидов ордугъа алмаларыны риджа этип ариза яза. Бойлеликнен, о Одессадаки арбий учуджылар мектебине ёлланыла. Мында да тек аля ве яхшы ишаретлернен окъуй. Арбий самолётларны буюк усталыкънен идаре этювни менимсей. Харьковда, сонъра Акъкерманда арбий хызметини девам эттире.
Арбий учуджы дженкнинъ ильк кунюнден урушкъа кире. Бу вакъытта о энди бомбардуман самолетны идаре эткен учуджы эди.
Абдураим Решидов дженк йыллары тек совет территориясында дегиль де, Румыния, Польша, Венгрия, Чехословакия, Австрия, Германия территорияларында озюнинъ ПЕ-2 бомбардуман самолётынен юзлернен урушлар нетиджесинде душманнынъ чокътан-чокъ джанлы кучюни, техникасыны, арбий силя сакълангъан анбарларыны, иншаатларыны, стратегик объектлерни патлатып, иштен чыкъара. Дженкнинъ сонъки куньлеринде исе арды-сыра секиз кере дженкявер вазифенен кокке котерилип, Берлинде Рейхстагны бомбалады. Бомбаларнынъ исе эр бири 250-ден 500 килограммгъадже бара эди.
Абдураим Измайлович 162-нджи авиаполкнынъ энъ мергин бомбалайыджысы олгъаныны эр кес пек яхшы биле эди. Айткъанларына коре, о бомбаны 1200 метр юксекликтен беш метрли нокътагъа там догъру ташлай экен. Шу себептен онъа ве онынъ эскадрильясына чокъ керелер энъ къыйын ве месулиетли вазифелер авале этильген.
Истидатлы учуджынынъ бойле усталыгъы, джесюрлигини козь огюне алып, умумий гъалебеге къошкъан къоджаман иссесине мунасип къыймет кесильди. Подполковник Абдураим Решидов дженк йыллары эскадрилья командири, сонъра авиаполк командирининъ муавини ве, ниает, сонъунда авиаполк командири ола. 222 дженкявер учуш япа. Муаребе йылларында косьтерген эрлик, джесюрлик ве къараманлыкълары ичюн эки Ленин ордени, учь дженкявер Къызыл Байракъ ордени, Къызыл Йылдыз, Суворов, Александр Невский, Чехословакия джумхуриетининъ Хачы орденлеринен мукяфатлангъан.
1945 сенеси июнь 27-де СССР Юкъары Шурасы Президиумынынъ Ферманынен мешур учуджы, къоркъу бильмез дженкчи Абдураим Измайлович Решидовгъа Советлер Бирлигининъ Къараманы унваны бериле.
О черик асыр арбий хызметте булунып, 1958 сенеси гвардиялы подполковник рутбесинде авиаполкнынъ командири вазифесинде истифагъа чыкъа ве чокъ йыллар девамында Къабарда-Балкъар автотранспорт идаресинде мадий-техника теминаты боюнджа болюкнинъ башы олып чалыша. Атта къараманларымызгъа биле Ватанымыз Къырымгъа келип яшамагъа ясакъ этильген куньлер кериде къалып, ярымадамызгъа ёллар ачылгъанынен о Къырымгъа келип, омюрнинъ сонъуна къадар (1982 с.) Акъмесджитте яшады.
Аблязиз Велиевнинъ «Къараманлар ольмейлер» китабындан
къыскъартылып алынды