Генерал Исмаил Булатов
Исмаил Булатов омюрининъ энъ чечекленген йылларыны орду хызметине багъышлагъан. Арбий ишни озюне зенаат оларакъ сечти ве омюр бою онъа садыкъ олып къалды.
Исмаил 1902 февраль 28-де Кезлев шеэринде фукъаре къорантасында догъды. Чобанлыкъ, ыргъатлыкъ япты, бабасы эрте ольгенинден себеп, анасына ярдым этмек, эки къардашыны ачтан ольдюрмемек ичюн он алты яшлы осьмюр эр сой къыйынлыкъларгъа къатланып, гедже-куньдюз чалышты.
Мектепте окъумакъны-язмакъны огренген Исмаил Акъмесджитке окъумагъа кетти. Эки йыл анда тасиль алды. 1924 сенеси бир группа яшлар иле Къазан шеэрине арбий-сиясий мектепке кетип окъуй. Эки йыл анда бильги алгъан сонъ Къызыл ордуда хызмет эте. 1933-1937-нджи сенелери Ленинграддаки Арбий-сиясий акдемияда окъуй. Оны битирген сонъ шу академияда курс ёлбашчысы оларакъ тайин этиле. Арадан чокъ кечмеден 39-нджы окъчылар дивизиясынынъ, 281-нджи, 584-нджи артполкларнынъ арбий комиссары ола.
Улу Ватан дженкнинъ биринджи куньлеринден урушларда иштирак этип башлады. Москва дживарындаки душмангъа къаршы уджумлерде курешти, Сталинград джебэсинде дженклешти. Волга дживарында олгъан бу акърансыз дженкни ич бир шейнен тенъештирмек мумкюн дегиль эди. Чюнки чатышмаларнынъ базы вакъытларында эки тарафтан бир кереден эки миллиондан зияде дженкчи, отуз бинъге якъын топ ве миномет, эки бинъден зияде танк, бу къадар да самолёт иштирак эткен аллар олды. Дженкчилер акърансыз джесюрлик косьтердилер. Бутюн бу вакъытта генерал Булатов аскерлер арасында булунды. Бир къач кере яраланды, контузиягъа огърады. Лякин озюне кельгенинен кене дженкке, озь аскерлери янына ашыкъты.
Дженк йыллары косьтерген джесюрликлери ве хызметлери ичюн генерал Булатов учь дане Къызыл Байракъ, II дереджели Кутузов, Суворов, II дереджели Богдан Хмельницкий, Ватан дженки орденлеринен, бир чокъ медаллер ве тыш мемлекетлернинъ мукяфатларынен такъдирленди.
1945 сенесининъ сонъунадже арбий хызметни девам этти. Агъыр хасталыкъ нетиджесинде истифагъа чыкъа. Омюрининъ сонъуна къдар Одессада яшай. 1948-1954 сенелери Одесса виляети иджра комитетинде чалыша. 1975 сенеси Одессада вефат эте ве шеэрнинъ Таиров къабиристанында дефн олунды.
Шаиримиз Решид Мурад онъа багъышлап 1959 сенеси «Генералнынъ икяеси» адлы шиирини язгъан эди. Онда бойле сатырлар бар:
Барышыкъ байрагъын котеринъ юксекке,
Ёкъ олсун къанлы дженк ве зевал!
Бунынчюн джан берди солдатлар джебэде,
Дженклерде чаларды генерал.
Аблязиз Велиевнинъ «Къараманлар ольмейлер» китабындан
къыскъартылып алынды