УЯН, ЧАТЫРДАГЪ, УЯН!
Къоркъма, миллетим, шашма, абдырама,
Къарышса да дюньямыз, эм адамлар.
Сонъу хайырдыр, къасеветке далма,
Эр бир дертнинъ озюндже дерманы бар!
Заман кельди, къырылдынъ айырылдынъ,
Ана юрттан, эвляттан ве багъынъдан.
Бинъ эзилип, бинъ кере къайырылдынъ,
Узакъ тюштинъ догъмыш Чатырдагъынъдан.
Эбет, эбет, бизим Чатырдагъымыз,
Ватанымнынъ къавий арман диреги.
Бизлер онъа санки ипсиз багълымыз,
Миллетимнинъ дерсинъ чатал юреги.
Бу эбедий сагълам арман дирекке
Омюр билля биз садыкъ къаладжакъмыз.
Саврулсакъ да бизлер узакъ-эрекке,
Къайтып кене онъа сарыладжакъмыз!
Чюнки о бизим сюргюн къырымларнынъ
Чектигине эбедий бир шааттыр.
Халкъны юрттан къувгъан бу мельунларнынъ
Бетине «шап» тюкюреджек бир заттыр.
Башымызгъа кельген нидже беляны,
Достум олсанъ, Чатырдагъдан бар сора,
О сёйлемез санъа ич де яланны,
Онда къырымларнынъ юреги ура.
Чатырдагъ корьди танъда эр бир койден,
Къырымларнынъ манърап сюрюльгенини.
Чатырдагъ корьди бинълернен эджельден
Сонъра халкънынъ къайта тирильгенини.
Чатырдагъ кене хатырлатмакъ истей
Кенди улу Чобан-заделерини...
Корьмей нефретимден патлайджагъым, дей
Шеит кеткен баба-деделеримни.
Чатырдагь деди: меним азиз халкъым,
Чатырдагъсыз бир ерде яшап олмаз.
Къайтыр манъа, менимле булур акъкъын.
Акъсыз аизарлар кимседе къалмаз!
Къырым меним асыл ватанымдыр деп,
Эджельсиз кеткенлернинъ эсабы ёкъ!
Къырымджа лаф эткенни гизли эплеп,
Дюньясындан отькеннинъ эсабы ёкъ!
Эбет, бизимдир бу гузель тувгъан иль,
Уян, Чатырдагъ, уян энди, олды...
Къырым деген асыл миллетинъни биль,
Укъукъсыз яшавдан чырайы солды.
Бу хорлукълар бир кунь енъиледжектир,
Къалкъарлар аякъкъа бизим къырымлар!
Душманнынъ башы да эгиледжектир,
Чюнки онынъ тюкенмез айыбы бар!
Темелимиз бизим Къырым илинде,
Сарсылмаз Чатырдагъгъа ошайджакъ!
Халкъ къонушыр экен къырым тилинде,
Чатырдагъ киби эбедий яшайджакъ!
1997 с., апрель, Акъмесджит
Достлукъ
Достлукъ
Достлукъ север.
Достлукъ-
Эр шейни енъер.
Къадрине етсек,
Олмамыз мухтадж,
Достлукътыр - достум,
Алтын тадж!
ТИЛЛЕР
Тиллер бар ки,
Татлыдыр балдан, шекерден.
Тиллер бар ки,
Бетердир аджджы зеэрден.
Татлы тиль-
Алемнинъ омрюни узатыр,
Аджджы тиль -
Халкъынънынъ юзюни къызартыр.
НАМУС
Намус инсанrъа
Яшлыкътан керек.
Бу ёлдан тайrъаннынъ
Бильгени козь, къаштыр.
Вакъыт тез кечер,
Ипраныр юрек,
Эдепсиз омюрнинъ
Ахыры козьяштыр.
ЯЗЫКЪ КИ...
Бир баrъчеван истемез,
Гульнинъ ачмай солrъанын.
Бир аиле истемез,
Эвляд яман олrъанын.
Языкъ ки, бу алемде
Ачмай гуллер де сола,
Тербиели аиледе
Базан тентек де ола.
КУНЕШ ЭГЕР...
Кунеш эгер
Озь ёлундан дёнсе де,
Акъикъий дост
Озь сёзюнден ич дёнмез.
Янып тургъан йылдыз кокте сёнсе де,
Челик достлукъ,
Садыкъ севги ич сёнмез!