1944 с. 18 майыс фаджиасынынъ 80 йыллыгъына. Шиирлер.

***

- Не ичюн пек эрте турсатасынъ, ана?

Пек салкъын азбарда.

Бу адам не ичюн бизлерге къычыра?

Насыл бир къабаат ишледим мен, ана?

Элимден о алды ве тепти торбамны,

Сен анда ун къойдынъ ве уфакъ къутуны.

Анавы копеги пек худжур, къоркъунчлы...

Къаракозь артымдан агълады, улуды...

Пек мутхиш бу гедже...

Ёкъ, ана, отурмам балабан машнагъа

Бу дегиль инатлыкъ, бир шейлер мен дуям...

Сен агълайсынъ, ана... Янагъынъ сыланды

Кель, сарайым сени, пайлашып дердинъни...

- Ач олдым, сувсадым...

Ибришнинъ татасы бир ерден 

сув тапып кетирди чёюнде

Ах, нефес алмасы пек агъыр, пек агъыр...

Тоз... вагон ичинде пек тынчыкъ... ёкъ ава

Чатипнинъ дедеси дефн этильмей ятты

Хатидже агълады, сачларны юлкъуды…

- Ах, анам... Хатырлайсынъ,

такос питеге сары май къойгъанда

ягъ, ошап гемиге, иригендже, ялдай...

- Къарт олюнен мени берабер бир гедже

бир титис чёллерде къалдырдынъыз сизлер.

Дженазе ерине – бир эльхамд ве амин

Йылдызлар тек эки мевтаны сакълады...

Ай биле яс тутты ве топракъ инъледи...

Ай биле аджыды къырымлы халкъны.

Дейлер Ай, йылдызда, джан деген шей олмаз

Йылдызлар нурыны первасыз тёкелер

Ве топракъ йыл-йылдан эр шейни унута...

Амма бу къарарны чыкъаргъан инсанда

Бизлерни ольдюрмек, эвиме сокъулмакъ

Тюшюнип яшагъан махлюкънынъ багърында

Тек къара къаранлыкъ бар эди, гъалиба...

***

Яры гедже... Эв тынчыды

Одаларны сукют сарды

Тюш коре кендже Амет

Сандыракълай, ынърана...

Дженктен окъув токътады

Бельки бу йыл олур къысмет

Нейсе мектепке онъа...

Мачик аран ичинде

Тапырдата аягъын

Сабыр этсе, Мачигим...

Бекле танънынъ ярыгъын…

Текне ичинде хамыр -

Ярын отьмек пиширирмиз,

Тесаддюфен бири кельсе,

Бир къач куньге еткизирмиз…

Нидже куньдир сокъакълардан

Кечти студебеккерлер.

Бизимкилер... Солдатлар.

Бельки, ёлны тюзетерлер...

Мен де алырым бир чырым,

Бир къач козьчик даа къалды...

Лянет бу дженк эпимизни

Тынч юкъудан айырды...

Вай, хайырлымы, бу да ким?!...

Дерсинъ, кельди Азраиль…

- Ачам! Иду!... Бельки, Аким?

Я да эвге къайтты Халиль...

- Ёкъ. Аллагъым... Олар дегиль...  

03.05.19