Юрий Османов

Биз бу гъайыпны даима сезермиз

1993 сенесининъ ноябрь 7 саба Къырым матбуат васталары, радио ве телевидениеси Юрий Османов беллисиз шараитлерде вахшийлердже ольдюрильгенини акъкъындаки дешетли хаберни даркъаттылар. Ольдюрюв сыры аля даа сырлыгъынен къалмакъта.

Юрий Османов – омюри, акъылы, ирадесини екяне макъсад – тувгъан халкъыны Ватангъа къайтарув, онынъ юртунда толу укъукълы шорбаджы оларакъ магърур яшамасы огърундаки курешке багъышлангъан.

Юрий Османов акъикъатен де пек чокъ шейлерден хабердар, къарардан чокъ иш япмагъа икътидарлы эди. Онъа Ватанда балалыгъында сюргюн этильмезден эвель учь йыл ве къайткъан сонъ учь йыл яшамакъ къысмет этти. Шу сонъки учь йыл ичинде о шу къадар чокъ иш япа бильди ки, меселемизнинъ чезимини чаналаткъан органлар ве шахыслар тап абдырадылар.

Ю. Османов басылмагъан бир шииринде: «Я никогда не изъяснюсь, и до конца не буду понят…», − деп язгъан эди. О этрафындакилерден бир къач къат юксек, озь девиринден баягъы огде эди. Ю. Османовны сонъунадже анъламакъ, онынъ миллетимиз ичюн эмиетини, къадрини, къыйметини анъламакъ ичюн даа чокъ-чокъ йыллар керек оладжакъ. Биз бу гъайипни даима сезермиз.
(Зера Бекированынъ макъалеси эсасында, 2003 с. ноябрь 8 «Янъы дюнья»)

О даима огге бакъып, келеджекни кунь эвельден коре эди. О озь халкъынынъ аджайип огълу, онынъ гъуруры, Къырымнынъ акъикъий ватанпервери, онынъ бутюн эалисининъ къайгъырыджысы, келеджек огърунда ëргъунлыкъ недир бильмеген эмекчиси эди. О шахсий джебини ич бир вакъыт тюшюнмеден, тек халкъны тюшюнген бир адам эди. Бугунь бойле сëзлерни ким акъкъында айтмакъ мумкюн? Бильмейим. 
(А.Г. Зарубин, тарих илимлери намзети, 1995 с. март 10 «Янъы дюнья»)