Yusuf Aliyev
(Tahallüsleri Ali, Hapsihorlı, Dragon)
1949 senesi iyul 11-de Özbekistannıñ Samarqand vilâyeti Valican köyünde doğuldı. Babası Ali Dragon, anası Ayşe Kerim bala-çağaları ile o deşetli 1944 senesi Qırımnıñ Suvdağ rayonı Qapsihor köyünden sürgün etildiler.
Yusuf Ali orta mektepni bitirgen soñ orduda hızmet etti, Taşkent devlet üniversitetinde rus filologiyası fakultetinde tasil aldı. Mektepte oca olıp çalıştı. Soñra «Lenin bayrağı» gazetasında edebiyat ve sanat bölüginde muarrir, «Yıldız» mecmuasında nesir eserleri bölügi mudiri, Nizamiy adına Taşkent devlet pedagogika institutında muallim, Özbekistan devlet Teleradiokompaniyasında qırım tili yayınları muarririyetiniñ mudiri vazifelerinde çalıştı.
Yusuf Aliniñ «Men seni unutmadım» serlevalı birinci eseri – novellası 1976 senesi dünya yüzüni kördi. Ondan soñ o sıra-sıra eserler yarattı ve derc etti: «Bir gece», «Ant», «Yürekten silinmez izler», «Ayaq sesleri», «Sügüt pıtaçığı», «Ana», «Olümden küçlü», «Söyleñiz, ne içün?!», «Sevinç közyaşları», «O aziz sımalarnıñ izinden», «Tilsiz şaatlar» kibi povest, hikâye, esseleridir. Bunıñle bir sırada o onlarle eserlerni qırım tiline çevirip, qırım oquyıcısını başqa halqlarnıñ edebiyatı nümünelerile tanış etti. Yusuf Aliniñ qalemi astından çıqqan eserler esasen «Yıldız» mecmuasında, «Lenin bayrağı» ve «Qırım» gazetalarında, çeşit cıyıntıqlarda dünya yüzüni kördiler. Bundan ğayrı o eki qısımdan ibaret «Qırımlılar» serlevası ile çıqqan bediy - publitsistik kinofilminiñ muellifidir.
Yusuf Ali bugün de- bugün Qırım mühendislik ve pedagogika üniversitetiniñ qırımtatar ve türk edebiyatı kafedrasında ders bere. Hocalıq faaliyetinen bir sırada o ilim ve icat ile oğraşa. Onıñ bediiy eserlerile birlikte edebiyatşınaslıq, folklorşınaslıq mevzularında maqaleleri de matbuatta muntazam sürette basılıp kelmekte. Yusuf Aliniñ «Çetel Qırım milliy edebiyatına bir nazar» serlevalı ilmiy işi kitap olaraq 2007 senesi neşirden çıqtı.