Ватансызлыкъ

Къара булут кене ата къара къарлар,

Бахт корьмеген (ватансызлыкъ) бизим къартлар.

Башкъа байракъ тутып юрген балачыкълар,

Тиль бильмеген (ватансызлыкъ) огълан- къызлар.

Пенджересиз эски эвлер сасып къалгъан,

Кимни корьген бу диварлар, эм сатылгъан.

Ташлар ташып эллер, беллер узюльген -

Бабаларымыз (ватансызлыкъ) кунь корьмеген.

Оджакъ якъып, бузлу сувнен огърашып

Яшлыкъ битти, омюр, бетлер бурюшик -

Аналарымыз, аналарымыз... (ватансызлыкъ!) -

Джанлы юрекке урулгъан тотлу мых!