Майыс айында. Шиир

Майыс айында яс тутты Къырым,

Мавы кокни чакъты бир йылдырым.

Тамчы-тамчы козьяшлар тёкюльди,

Ана-юртундан миллет сюрюльди.

Чёлю, дагълары, къыр, ялы бою,

Эви, азбары, мал-мулькю, кою,

Эпси, тувгъаны, къалды еринде,

Кельген-кечкен авджылар элинде.

Дарма-дагъын этильди мезарлар,

Аля бугунь тынмай ах-у зарлар.

О майыстан сонъ кечти чокъ айлар,

Куреш ёлуны сечти акъайлар.

Къор астындан баш котерди миллет,

Къартлардан яшларгъа бир васиет:

«Асла хор бакъманъыз ана-ерге,

О ер асабалыкътыр сизлерге».

Бугунь янъыдан джанлана дияр,

Юкъудан уяна эвлиялар.

Бай Къыятта, Судакъта башташлар,

Къайтадан тиклене, эй, юртдашлар.

Барсын, къурулсын джами, мектеплер,

Барсын, бирлешсин миллет, мезхеплер.

Чечек ачсын мис къокъулы ювшан,

Къайтып кельген халкъкъа шереф ве шан!

2003 с.